काठमाडौँ – कोरोनाकै बीच कर्जा सापटीदेखि कर्जा ब्याज तथा किस्ता अनलाइनबाटै भुक्तान गर्ने सक्ने सेवा प्रदान गर्दै आएको कर्मचारी सञ्चयकोष आज ५९ औं वर्षमा प्रवेश गर्दैछ । सम्पूर्ण सेवाहरूलाई डिजिटलाइज गर्दै कागजविहीन बनाउने अभियान स्वरुप कोष अगाडि बढेको कोषका प्रशासक तुलसीप्रसाद गौतमले बताए ।यो सँगै डिजिटल प्रविधिमा आवद्ध भएसँगै सामान्य कामका लागि कोषको कार्यालयमै पुग्नुपर्ने अवस्था हटेको छ । कोरोना अघिसम्म कुनै पनि सञ्चयकर्ताले सानो कामको लागि पनि कोषको कार्यालय पुग्नुपर्ने अवस्था थियो । कोषले यो अवसरमा बुधबार नेपालकै सबैभन्दा आधुनिक डाटा सेन्टरको शुभारम्भ गरेको छ । कोषको डाटा सेन्टर यसभन्दा अगाडि कर्मचारी सञ्चयकोषको भवन ठमेलमा राखिएको थियो । ठमेलबाट पुल्चोकमा सार्ने क्रममा अत्यन्तै सुरक्षित, ठूलो र स्वचालित डाटा सेन्टर तयार भएको छ । कोषले यस वर्ष सबैभन्दा धेरै सूचना तथा प्रविधिको क्षेत्रमा फड्को मारेको छ ।साथै कोषले आफ्ना सञ्चयकर्तालाई देशका विभिन्न स्थानमा आवास सुविधा उपलब्ध गराउने भएको छ । आफ्ना सञ्चयकर्तालाई आवसको सुविधा दिन कोषले देशका विभिन्न स्थानमा आवास निर्माण कार्यलाई अघि बढाउन लागेको छ । यसका साथै कर्मचारी सञ्चयकोषले सुन्धरास्थित काठमाडौं महललाई ‘रिनोभेट’ गर्ने भएको छ । कोषले उक्त भवनको दक्षिणपट्टीको साइटमा पारदर्शी लिफ्ट रोखेर महलको माथिल्लो तलमा जान मिल्ने बनाउन लागेको हो । कोषका प्रशासक गौतमले काठमाडौं महलबाट धरहरा राम्रोसँग अवलोकन गर्न मिल्ने गरी महलको ‘रिनोभेट’ गर्न लागिएको बताए ।