काठमाडौं ।राष्ट्र बैंकले ल्याएको स्थिर ब्याजदर नीतिप्रति नेपाल बैंकर्स संघले असन्तुष्टि जनाएको छ । एकीकृत निर्देशनको विषयवस्तुमाथि छलफलको क्रममा नेपाल बैंकर्स संघका अध्यक्ष भुवन दाहालले स्थिर ब्याजदर नीति लागूू गर्ने क्षमता नेपालका बैंकहरुसँग नभएको बताएका हुन् । नेपाल चार्टर्ड एकाउन्टेन्ट संघ (एक्यान) ले आयोजना गरेको छलफलमा दाहालले यो व्यवस्थाले वित्तीय क्षेत्रमा असन्तुलन हुनसक्ने भन्दै यसलाई राष्ट्र बैंक र बैंकहरु बसेर छलफल गर्नुपर्ने माग समेत गरे ।

नेपाल राष्ट्र बैंकले एकीकृत निर्देशनमाथिको संशोधन गर्दै मंगलबार  विभिन्न व्यवस्था लागूू गरेको थियो । कुल ७३ पेज र १९८ बुँदामा समेटिएको उक्त संशोधनमा बैंक तथा वित्तीय संस्थालाई प्रभाव पार्नेगरी ४० वटा भन्दा बढी व्यवस्था गरिएका छन् । त्यसमध्ये केही बुँदाहरु बैंकले बैंकलाई सहजता थप्नेगरी आएको छ भने केही विषय चाहिँ भाषागत त्रुटी सच्याउने र अस्पष्टता हटाउनेगरी आएको छ । यस्तै केही बुँदाले भने बैंकहरुको वित्तीय अवस्थामा ठूलै असर गर्ने बैंकरहरुको भनाइ छ ।

त्यसको जोखिम बैंकहरुले लिन सक्ने अवस्था नरहेको दाबी छ ।