नेपाललाई विश्व बैंकले करिब ५४ अर्ब रुपैयाँ बराबरको ऋण सहायता दिने भएको छ । विश्व बैंकले यातायात पूर्वाधारको क्षमता र सुरक्षा सुधार लगायत सीमापार व्यापारको दक्षतामा सुधार र रणनैतिक सडक सञ्जल व्यवस्थापन क्षमताको सुदृढीकरणका लागि ५४ अर्ब रुपैयाँ ऋण सहायता दिने भएको हो ।

अर्थमन्त्री डा युवराज खतिवडाको उपस्थितिमा शुक्रवार अर्थ मन्त्रालयमा नेपालका लागि विश्व बैंकका देशीय प्रबन्धक फारिस हदाद जर्भोस र अर्थसचिव शिशिरकुमार ढुंगानाले ऋण सहयोगसम्बन्धी सम्झौतामापत्रमा हस्ताक्षर गरे। परियोजना अन्तर्गत नागढुंगा–नौबिसे–मुग्लिंग खण्डलाई सुधार गर्नुका साथै कमला–ढल्केबर–पथलैया सडकको स्तरोन्नति गर्दै चार लेनको बनाइने छ । विद्यमान व्यापारिक सेवालाई सहज बनाउनुका साथै कृषिजन्य निर्यातलाई प्रवर्द्धन गर्नका लागि यस आयोजनाले सीमा–नाकाहरूमा पूर्वाधार, सेवा सुविधा तथा सरसफाइमा सुधार गर्ने छ ।