काठमाडौं । चालु आर्थिक वर्षको बजेट तथा मौद्रिक नीतिले गरेको व्यवस्था अनुसार कृषि विकास बैंकले ‘किसान क्रेडिट कार्ड’ निर्माणका लागि आन्तरिक तयारी शुरु गरेको छ । उक्त कार्डमार्फत किसानले कर्जा र अनुदानको सम्बन्ध, भुक्तानी प्रणालीमा मल, बिउ विजन र उपकरण खरिदका लागि निश्चित रकमसम्म सोही कार्डबाट भुक्तानी गर्न मिल्ने व्यवस्था सहितको किसान क्रेडिट कार्ड ल्याउन लागेको हो ।

कृषि विकास मन्त्रालयले स्थानीय तहहरूसँग समन्वय गरेर कस्ता किसानलाई कार्ड दिने भन्ने विषय टुंगो लगाउने बैंकले बताएको छ । यो कार्डमार्फत पाँच प्रतिशतको सहुलियतपूर्ण कर्जा, ठूला कर्जा, साना कर्जा सबैलाई समावेश गर्छाै । सेवा शुल्क पनि राष्ट्र बैंकले तोके बमोजिम मात्रै हुनेछ । किसानहरुका लागि बैंकले नै तयार पारेको छुट्टै कार्ड हो । किसानको नाम, ठेगाना लगायतका विवरण समेटिएको स्वाप प्रणालीबाट भुक्तानी हुने कार्ड नै हो । कार्डमा किसानहरुले आफ्नो कमाइ राख्न सक्छन्, ऋण लिएको पैसा राख्न सक्छन् । धितो राखेर लिएको ऋण पनि कार्डमा राख्न सकिन्छ ।

कार्डमा एपको माध्यमबाट किसानलाई आवश्यक सूचना तथा जानकारी पनि दिइने छ भने कुनै किसानलाई तत्कालै रकम चाहिएमा नजिकैको बैंक वा एटीएमबाट सोही कार्डका आधारमा नगद भुक्तानीको सुविधा हुनेछ । बैंकले क्रेडिट कार्ड निर्माण प्रक्रिया शुरु गरेको ‘किसान कार्डमार्फत किसानहरुलाई निश्चित रकम भुक्तानीका साथै विभिन्न सूचना उपलब्ध गराउन सकिन्छ,’ बैंकमा प्रवक्ता हिमलाल पौडेलले बताए । उनले भने ‘हामी पहिलो चरणमा डेढ लाख किसानलाई सो कार्ड उपलब्ध गराउने कार्ययोजना बनाएर अघि बढेका छौं । कार्डमा किसानले आफ्ना उत्पादन बेच्ने, खरिद गर्नेहरूको सम्बन्ध पनि जोडिएको हुनेछ ।’

कार्ड निर्माणको आन्तरिक प्रक्रिया न्तिम चरणमा पुगेको छ । जतिसक्लदो छिटो हामी यसलाई कार्यान्वयनमा ल्याउँछौं,’ उनले भने ‘किसानको आवश्यकतालाई ध्यानमा राखेर कार्ड निर्माण प्रक्रिया अघि बढेको छ। । किसानका लागि मल बिउ, उपकरण किन्ने, आफ्ना उत्पादन बेच्ने, कामदारलाई भुक्तानी दिने, कृषि सम्बन्धी जानकारी लिने लगायतका आधारभूत सूचना एपबाटै समाधान हुनेछ ।

कार्डमा कर्जा लिएका ग्राहकहरुका लागि भुक्तानीको सीमा तोकिएको हुन्छ । त्यस्तो खाता पनि कार्डसँग जोडिने छ । बिक्रेताहरु कहाँ पनि खातामा रकम जम्मा भएको सूचना पुग्नेछ । कार्ड वितरणको लागि बैंकले एउटा गाइड लाइन नै तयार पार्नेछ । किसानले बैंकमा खाता खोल्दा वा ऋणका लागि आवेदन दिँदा नै क्रेडिट कार्डका लागि पनि आवेदन दिनुपर्छ । मोबाइल बैंकिङ, इन्टरनेट बैंकिङको सुविधा लिएको जसरी नै क्रेडिट कार्ड पनि लिन सकिन्छ । जनताको बैंक र प्रतिफल कृषि विकास बैंकको निक्षेपमा ८५ प्रतिशत हिस्सा साना निक्षेपकर्ताहरुको छ ।